SIKU YA MTOTO WA AFRIKA YAFANA KATA YA THAWI

Posted on: June 17th, 2025

Watoto wa Kata ya Thawi,Halmashauri ya Wilaya ya Kondoa wameungana watoto wengine wa nchi za Afrika kuadhimisha Siku ya Mtoto wa Afrika.

Hayo yamejiri mapema Juni 16,2025 katika viwanja vya Shule ya Msingi Thawi wakijumuika pamoja na Viongozi ngazi ya Halmashauri na Kata pamoja na Wazazi wa Watoto hao kusherehekea siku hiyo.

Akifungua sherehe za Maadhimisho hayo kwa niaba ya Mkurugenzi Mtendaji Halmashauri,Mwl.Line Chanafi ambaye ni Mkuu wa Divisheni ya Elimu Sekondari amesema wazazi wana jukumu la kuhakikisha mtoto analindwa dhidi ya vitendo vya ukatili ikiwa ni pamoja na vipigo, kuchomwa moto, ubakaji, ulawiti na kutogwa na vitu vyenye ncha kali vikitokomezwa vitendo hivi kwa kuwashirikisha watoto katika kutoa taarifa za viashiria vya ukatili wanaofanyiwa wakiwa shuleni, nyumbani , na maeneo mengine.

"Sisi kama wazazi tujitahidi kuwatimizia watoto wetu mahitaji yao ya msingi bila kubaguliwa kwa jinsi zao  yakijumuisha chakula chenye lishe,huduma za Afya,Elimu,Mavazi na Malazi.Mtoto aliyepatiwa mahitaji yake ya msingi sio rahisi kushawishika kujiingiza kwenye tabia hatarishi." Ameongeza Mwl.Chanafi.

Kwa upande wake Mkuu wa Divisheni ya Maendeleo ya Jamii Halmashauri Bi.Rahiya Nasser amesema lengo kuu la maadhimisho hayo ni kuwaweka pamoja,wakikumbushana thamani,utu na umuhimu wa mtoto katika ngazi ya familia, jamii,na taifa kwa ujumla likienda sambamba na Kaulimbiu isemayo "Haki za Mtoto : Tulipotoka, Tulipo na Tuendako".

Naye Diwani mwenyeji wa kata ya Thawi Mhe.Juma Hapi ameipongeza Ofisi ya Mkurugenzi kwa kuichagua kata hiyo kuwa mwenyeji wa maadhimisho hayo ngazi ya Halmashauri,akiwaasa wananchi na wazazi kuyafanyia kazi maagizo ya Mgeni rasmi dhidi ya Maadhimisho hayo.

Kila mwaka tarehe Juni 16,Serikali ya Tanzania huungana na nchi zingine  za Afrika kusherehekea Siku ya Mtoto wa Afrika ambapo kwa ngazi ya Halmashauri yamefanyika katika Shule ya Msingi Thawi.