RC SENYAMULE ATOA MAAGIZO MAZITO HALMASHAURI ZA MKOA WA DODOMA TAMASHA LA JINSIA NGAZI YA WILAYA

Posted on: August 28th, 2024

Mkuu wa Mkoa wa Dodoma Mhe.Rosemary Senyamule amezitaka Serikali za Mitaa na Halmashauri za Mkoa wa Dodoma kuendelea kutoa elimu kwa wananchi, kupata taarifa mbalimbali za msingi na za muhimu kwa mambo yanayoendelea ya Serikali yao.

Mhe.Senyamule ameyasema hayo akizindua Tamasha  la 7 la Jinsia ngazi ya Wilaya lililoandaliwa na Mtandao wa Kijinsia Nchini (TGNP) pamoja na Washirika wanaotetea Haki za Wanawake nchini viwanja vya sabasaba wilayani Kondoa.

Mhe.Senyamule amesema"Wanaofuatilia habari za Serikali ni wachache, tunayo kazi kubwa kupitia Serikali za Mitaa, Halmashauri kuendelea kutoa elimu na hamasa  ya kutosha kwa wananchi wetu, kupata taarifa za msingi na muhimu juu ya mambo yanayoendelea kwenye nchi yao."

"Dira hii ni jumuishi tumepata fursa na bahati ya kuchangia kwa ajili ya vizazi vijavyo, tuwapangie mambo ya muhimu ambayo hata wao wakija kuyakuta na kuyasoma wajivunie na niendelee kuwaomba wadau wetu TGNP na wadau wengine mlioshirikiana nao muendelee kutoa elimu hizi katika ngazi za chini na kushirikiana na maafisa maendeleo ya jamii ameongeza Mhe.Senyamule.

Kwa upande wake Mkurugenzi Mtendaji wa TGNP Bi.Lilian Liundi amesema nchi ya Tanzania imepiga hatua katika masuala ya usawa wa kijinsia ambapo kwa sasa wanawake wanashika nafasi za uongozi akimtolea mfano Mhe.Rais Dkt.Samia Suluhu Hassan, Spika wa Bunge Mhe.Dkt Tulia Akson, Wabunge wa kike wa kuchaguliwa na kuteuliwa wanaofikia asilimia 37% pamoja na uwepo wa Mkuu wa Mkoa wa Dodoma Mwanamke Mhe.Rosemary Senyamule na Mkuu wa Wilaya ya Kondoa mwanamke Mhe.Fatma Nyangassa wakiwa ni miongoni mwa Viongozi wanawake wachache nchini.

Tamasha hili ni la Saba nchini lililoandaliwa na Mtandao wa Kijinsia Nchini (TGNP)lilitanguliwa na matamasha mengine yaliyofanyika katika wilaya zingine, ikiwemo Kisarawe(2010), Kata ya Mkambarani -Morogoro (2011na 2016), Kata ya Nyamaranda-Tarime (2014), Mkoa wa Shinyanga Wilaya ya Kishapu (2018)na Mkoa wa Mbeya Kata ya Ijumbe (2020).