RAS DODOMA AZUNGUMZA NA WATUMISHI HALMASHAURI YA WILAYA YA KONDOA

Posted on: September 16th, 2025

Katibu Tawala wa Mkoa Dodoma, Dkt.Khatibu Malimi Kazungu amewaasa Watumishi wa Halmashauri ya Wilaya ya Kondoa kuendelea kufanya kazi kwa bidii kwa kuwahudumia wananchi sanjari na utatuzi wa kero.

Ameyasema hayo mapema Septemba 16,2025 katika ziara yake Halmashauri ya Wilaya ya Kondoa akibainisha msimamo wa Serikali ikijikita kusimamia ustawi chanya wa watumishi wake  kwa kusimamia haki zao.

Dkt. Kazungu amesema  Sekta ya Utumishi wa Umma ni muhimu katika kukuza maendeleo ya kiuchumi na kijamii akiwataka watumishi hao kujenga tabia ya ushirikiano, maelewano na upendo baina yao.

" Nchi ya Tanzania inaongozwa na Dira ya Maendeleo 2050 niwasisitize watumishi wote kufanya kazi kwa juhudi ili kuendana na kasi ya Serikali katika utendaji wake tukiyafikia malengo yaliyowekwa katika Dira hiyo" alielekeza Dkt.Kazungu.

Aidha amewaasa watumishi hao kujitokeza na kushiriki zoezi la uchaguzi litakalofanyika Oktoba 29,2025.

Awali akiwasilisha taarifa ya kiutendaji wa Halmashauri, Mkurugenzi Mtendaji wa Halmshauri ya Wilaya ya Kondoa Ndg. Shaban Millao ametumia nafasi hiyo kumpongeza Katibu huyo kwa kuaminiwa na Mhe.Rais Dkt.Samia Suluhu Hassan akimteua kuuhudumia Mkoa wa Dodoma kwa nafasi ya Katibu Tawala wa Mkoa wa Dodoma.

 Ziara hii muendelezo wa ziara za kimkakati na kiutendaji zinazofanywa na Katibu Tawala wa Mkoa wa Dodoma Dkt. Khatibu Malimi Kazungu katika Halmashauri za Mkoa wa Dodoma