MWENYEKITI WA HALMASHAURI KONDOA DC AIPONGEZA CMCR -DODOMA

Posted on: January 26th, 2025

Mwenyekiti wa Halmashauri ya Wilaya ya Kondoa Mhe.Abdalah Maguo ameshukuru na kupongeza Shirika lisilo la kiserikali CMCR-Dodoma kwa kuwezesha wahudumu wa afya wa Halmashauri na wahudumu afya ngazi ya jamii.

Hayo ameyasema katika kikao cha Tathmini ya pamoja dhidi ya Ugonjwa wa Kifua kikuu na UKIMWI katika hafla fupi ya ukomo wa mradi unaofadhiliwa na shirika hilo, akiahidi msimamo wa Halmashauri katika usimamiaji wa vifaa wezeshi ili kuendelea kufanya kazi na kuvifanyia matengenezo pale inapohitajika.

"Kama halmashauri tutahakikisha yale yote ambayo yalianzishwa na CMCR kuisaidia Halmashauri yetu yanakua endelevu na nawaelekeza wataalam wetu ngazi ya Halmashauri na wahudumu ngazi ya jamii kuendelea kuwabaini waathirika wa magonjwa haya, kwa kutoa elimu ya kutosha" amesisisitiza Mhe.Maguo.

Kwa upande wake Mganga Mkuu wa Mkoa wa Dodoma Dkt.Ruta Chunzibwa amesema halmashauri ya wilaya ya Kondoa ni mojawapo ya halmashauri za Mkoa wa Dodoma zilizopata nyenzo za kudhibiti maambukizi ya Virusi vya Ukimwi na Kifua kikuu kwa Imani kwamba washiriki wa kikao hicho wataenda kufanya vizuri ili kupunguza maambukizi ya magonjwa hayo.

Naye Meneja Mradi Dkt.Hamoud Ndenge katika taarifa yake amesema, mradi ulijikita katika kupunguza maambukizi ya VVU na Kifua kikuu kwa kuwajengea uwezo watumishi halmashauri, utoaji vifaa tiba katika vituo vya kutolea huduma za afya Halmashauri, kuwajengea uwezo wahudumu wa afya ngazi ya jamii na kuwapa vitendea kazi wahudumu hao.

Kikao hicho kimefanyika  Ukumbi wa Mikutano wa Kanisa Katoliki Kondoa Mjini na kuwakutanisha Wawakilishi kutoka Wizara ya Afya, TAMISEMI, Kamati ya kusimamia huduma za afya mkoa (RHMT) na Halmashauri (CHMT) pamoja na Waganga wafawidhi kutoka vituo vyote 26 vya kutolea huduma za afya halmashauri ambavyo mradi huu umetekelezwa.

Katika kipindi chote cha mradi, Halmashauri imenufaika kwa kukarabatiwa kwa vituo 8 vya kutolea dawa za kifua kikuu (Dot Center), Ununuzi wa Samani, Usimikaji wa Mifumo ya Sola katika vituo  6 vya kutolea huduma.

Miongoni mwa vituo vya kutolea huduma vilivyonufaika ni pamoja na Kituo cha Afya cha Bereko,Thawi,Kalamba,Mnenia, Pahi, Busi, Itololo, Mauno pamoja na baadhi ya  Zahanati.