MSIMAMIZI WA UCHAGUZI HALMASHAURI YA WILAYA YA KONDOA AFUNGUA SEMINA ELEKEZI KWA WASIMAMIZI WASAIDIZI WA UCHAGUZI

Posted on: October 1st, 2024

Msimamizi wa Uchaguzi Halmashauri ya Wilaya ya Kondoa Ndg.Shaban Millao amefungua Semina elekezi ya siku moja kwa Wasimamizi Wasaidizi wa Uchaguzi ngazi ya kata na vijiji Ukumbi wa Mikutano Kondoa Irangi Kondoa Mjini.

Ndg.Millao ametumia nafasi hiyo kuwasisitiza wasimamizi hao kuweka umakini katika mafunzo hayo ili iwarahisishie katika utekelezaji wa majukumu ya usimamizi wa uchaguzi kwa kufuata kanuni na miongozo iliyowekwa kwa ajili ya kuendesha uchaguzi huo.

"Zingatieni Mafunzo haya yanayotolewa na wawezeshaji, mkizingatia kanuni na miongozo ya Uchaguzi huu wa Serikali za Mitaa pale ambapo hujaelewa vyema uliza maswali upate majibu sahihi".

Sambamba na hilo Ndg.Millao amewasisitiza wasimimizi hao kuendelea kutoa elimu ya kutosha kwa wananchi kuhusu uchaguzi wa serikali za mitaa bila kuchoka,wakiwahamasisha wananchi wenye sifa za kuwa viongozi kuchukua fomu za kugombea wakidhaminiwa na vyama vyao.

Vivyo hivyo Ndg.Millao amehimiza wanawake na watu wenye ulemavu kujitokeza kwa wingi kujiandikisha na kupiga kura wakitimiza sifa elekezi.

Pia katika semina hiyo Ndg.Millao amepongeza jitihada za wasimamizi hao  katika kuandaa mabonanza,wakihamasisha wananchi kujiandikisha na kupiga kura kupitia elimu ya uchaguzi wa serikali za mitaa mwaka 2024 na michezo mbalimbali ikiwemo ngoma za asili,mpira wa miguu n.k.

Semina  hiyo imelenga kuwajengea uwezo wasimamizi wasaidizi wa uchaguzi ngazi ya kata na vijiji ili kuhakikisha zoezi la uandikishaji na upigaji wa kura unakwenda vizuri kwa kufuata kanuni na miongozo iliyowekwa kwa ajili ya uchaguzi wa serikali za mitaa.

Miongoni mwa matukio muhimu yajayo katika kuelekea Uchaguzi wa Serikali za Mitaa mwaka 2024 ni pamoja na zoezi la uandikishaji nchini litakaloanza Oktoba 11 hadi 20 ,2024 baada ya kutangazwa mipaka ya kiutawala siku chache zilizopita.

"Serikali za Mitaa, Sauti ya Wananchi Jitokeze kushiriki Uchaguzi".