MRADI WA SOKO WA KIJANA ISSA SEMBIRA WAMKOSHA KIONGOZI MBIO ZA MWENGE 2024

Posted on: July 2nd, 2024

Kiongozi Mkimbiza Mwenge mwaka 2024,Ndg.Godfrey Mnzava amependezwa na Mradi wa Soko wa Kijana Issa Juma  Sembira uliopo katika kijiji cha Kisese Disa-Kata ya Kisese Halmashauri ya Wilaya ya Kondoa.

Ndg.Mnzava ameyasema hayo alipomtembelea Bw.Issa akiambatana na wakimbiza mwenge kitaifa mwaka 2024,akiishukuru Serikali ya awamu ya sita kupitia Wizara ya Kazi,Ajira,Vijana na Watu wenye Ulemavu kwa kuweka utaratibu wa utoaji mkopo kwa kijana mmoja bila kujiunga kwenye kikundi.

Bw.Issa Sembira ni mnufaika wa mkopo huo kwa kupewa kiasi cha Tsh Mil 30,mwezi Oktoba 2022 zilizomsaidia kuboresha na kutanua mradi wake wa soko wenye jumla ya vibanda vya Biashara 28(Fremu),vibanda vya mabati 5,vibanda vya mbao 4,mabanda ya kuku 2 pamoja na vizimba vya zege 32.

Awali katika taarifa yake, Bw.Issa amesema mradi huo wa soko umetoa ajira kwa wafanyabiashara 61 waliokodi vibanda ukilinganisha na ajira kwa watu 10 zilizotolewa wakati Mwenge wa Uhuru ulipotembelea mwaka 2019.

Kupitia mradi huo Bw.Issa ametoa ajira kwa  vijana 10 wanaomsaidia katika Biashara zake sokoni pamoja na kuwepo kwa soko hilo umechangia ufanyikaji wa gulio kila siku ya ijumaa ukiwakutanisha zaidi ya Wafanyabiashara 300 wanaoleta bidhaa zao katika soko hilo.

Sambamba na Ugeni wa Wakimbiza Mwenge wa Uhuru Kitaifa mwaka 2024 wakiongozwa na Ndg.Godfrey Mnzava,alijumuika na Mwenyeji wake Mkuu wa Wilaya ya Kondoa Mhe.Fatma Nyangassa &kamati ya Usalama Wilaya, Waziri wa Viwanda na Biashara &Mbunge wa Jimbo la Kondoa Mhe,Dkt Ashatu Kijaji, Mkurugenzi Mtendaji Halmashauri ya Wilaya ya Kondoa Ndg.Shaban Millao,Waheshimiwa Madiwani, Watumishi wa Halmashauri pamoja na Wananchi.

Mbio za Mwenge wa Uhuru mwaka 2024, zinabeba Ujumbe usemwao 'Tunza Mazingira na Shiriki Uchaguzi wa Serikali za Mitaa kwaUjenziwaTaifaEndelevu.