MRADI WA PROGRAMU YA STADI ZA MAISHA SHULE ZA SEKONDARI KONDOA DC WAZINDULIWA

Posted on: May 20th, 2024

Katibu Tawala Wilaya Kondoa Bi.Christina Kalekezi kwa niaba ya Mkuu wa Wilaya Kondoa Mh.Dkt Khamis Mkanachi amezindua Programu ya Stadi za Maisha itakayotumika kwa wanafunzi wa kidato cha kwanza katika Sekondari 27 za Halmashauri ya Wilaya ya Kondoa kuanzia mwaka 2025.

Katika Uzinduzi huo Bi.Kalekezi ametumia nafasi  hiyo kumpongeza Mhe.Rais Dkt.Samia Suluhu Hassan katika utekelezaji wa Sekta ya Elimu nchini akishirikiana na Wadau mbalimbali wa maendelea kupitia Wizara zake ikiwemo Ofisi ya Waziri Mkuu Kazi, Ajira ,Vijana &Wizara ya Maendeleo ya Jamii,Wanawake na Makundi Maalum wakishirikiana na Shirika lisilo la kiserikali (CAMFED) kwa kuratibu na kuandaa mafunzo kwa Maafisa Elimu Kata,Wakuu wa Shule na Walimu Walezi watakaosimamia mradi wa stadi za maisha kwa wanafunzi wa kidato cha kwanza.

"Sisi ndio chachu ya kujitambua kwa wanafunzi wetu,mkawe mabalozi wazuri na kusaidia kupata walimu watakaowafundisha vyema wanafunzi kuwa wazalendo,kujiamini, kuinua ufaulu wa wanafunzi kwa kupenda shule,kufuta utoro ili kupata taifa Bora la Leo na kesho" amesema Bi.Kalekezi.

Awali katika taarifa yake Mratibu wa mradi huo kutoka shirika lisilo la kiserikali (CAMFED)Mkoa wa Dodoma Bi.Clara Joseph amesema Mkoa wa Dodoma ni miongoni mwa mikoa 10 kupitia Halmashauri zake 8 ambazo zitanufaika kwa kuwajengea uwezo Maafisa Elimu Kata,Wakuu wa Shule na Walimu Walezi kwa kuwa wasimamizi wa programu ya stadi za maisha kwa wanafunzi wa kidato cha kwanza kuanzia Januari 2025 shule za Sekondari lengo likiwa ni kuongeza ufaulu mashuleni,wanafunzi kupenda masomo, kupunguza Utoro na kujitambua.

Kwa niaba ya wanufaika wa Mafunzo hayo Afisa Elimu kata ya Pahi Mw.Adam Faraji amesema wamepokea maelekezo wakiadi kwenda kusimamia ipasavyo mradi huo.

Mradi huu wa Stadi za Maisha unatekelezwa katika halmashauri 76 nchini ukiwa na maono ya kuwa na Dunia ambayo kila Mtoto anaelimika,kulindwa,kuheshimiwa,Anathaminika na kukua kwa kuondokana na Wimbi la Umasikini.