MRADI WA "PAMOJA TUWALISHE" WAPONGEZA UTOAJI WA CHAKULA SHULE ZA MSINGI KONDOA DC

Posted on: July 26th, 2024

Serikali ya Tanzania kwa kushirikiana na Serikali ya Marekani kupitia Shirika lisilo la kiserikali la "GLOBAL COMMUNITIES" yenye Mradi wa "Pamoja tuwalishe", wametembelea na kukagua mradi wa chakula kwa wanafunzi baadhi ya Shule za Msingi nufaika Halmashauri ya Wilaya ya Kondoa.

Ziara hiyo imewakutanisha Wawakilishi kutoka "Global Communities" wakiongozwa na Bwana Paul Alberghine & Bi.Celeste (Wizara ya Kilimo Marekani), Wasimamizi wa Mradi Tanzania, Mwakilishi kutoka OR-TAMISEMI Idara ya Usimamizi wa Elimu Bw.Greyson, timu ya Wataalam Mkoa wa Dodoma pamoja na Wataalam kutoka Halmashauri wakiongozwa na Afisa Elimu Awali &Msingi Mw.Eugen Shirima.

Ugeni huo kwa pamoja umeridhishwa na kasi ya utoaji wa milo kwa siku tano za masomo ikijumuisha mchango wa chakula cha wafadhili (siku 3) pamoja na chakula cha Jamii (siku 2) walipozitembelea baadhi ya shule za Msingi ambazo ni Kwadinu, Isabe na Mnenia.

Mradi wa Pamoja tuwalishe  halmashauri ya wilaya ya Kondoa unazinufaisha jumla ya shule za msingi 25 Kata za Haubi, Kwadelo, Itaswi, Thawi pamoja na Soera. Mradi huu unalenga kusaidia ongezeko la mahudhurio na kupunguza tabia ya utoro, ongezeko la muda wa masomo, ushiriki wa wazazi katika maendeleo ya elimu kwa watoto wao, kupunguza matukio ya ukatili wa watoto pamoja na kuboresha afya za watoto na kuwafanya wawe na utulivu na kuzingatia masomo wakati wa kujifunza.

Sambamba na hayo, Mradi wa Pamoja tuwalishe  unajihusisha na  Ujenzi wa Maktaba, Madarasa, Vyoo, Uchimbaji Visima pamoja na Uchangiaji wa chakula mashuleni ambao umeanza katika Halmashauri ya wilaya ya Kondoa tangu kutambulishwa kwa mradi mwezi Julai 2023.

Pia kupitia mradi huu shule nufaika zimejenga majengo ya Meko na stoo kwa nguvu za wananchi pamoja na uanzishwaji wa Bustani za Mboga mboga na matunda ambazo zimesaidia kuboresha mlo unaotolewa shuleni.