MILA NA DESTURI KANDAMIZI ZAPINGWA, MRADI WA MWANAMKE NA UONGOZI

Posted on: April 2nd, 2024

Halmashauri ya Wilaya ya Kondoa kupitia Ofisi ya Kata ya Haubi ikishirikiana na Mtandao wa Jinsia Tanzania (TGNP)imeratibu na kufanya Mdahalo wa wazi wakiadhimisha Siku ya Wanawake Duniani kupitia Kaulimbiu isemayo’’Wekeza kwa Mwanamke,kuharakisha Maendeleo ya Taifa na Ustawi wa Jamii’’.

Akifungua Mdahalo huo Diwani wa Kata ya Haubi Mh.Paulo Irovya amesema Agenda ya Wanawake na Uongozi ni agenda muhimu kwa kuzingatia kuchagua na kuchaguliwa ni haki ya kila mtu,akisisitiza wanawake wanakila sababu za kugombea nafasi mbalimbali za uongozi.

Bi.Elizabert Shoo ambaye ni Afisa Maendeleo ya Jamii Halmashauri ya Wilaya ya Kondoa amewashukuru na kuwapongeza wananchi wote waliojitokeza katika mdahalo huo pamoja na Mtandao wa Jinsia Tanzania(TGNP) kwa kuwa chachu ya maendeleo wakisaidia uchambuzi wa Bajeti zenye mlengo wa kijinsia kwa kutoa fursa sawa za wanawake kushiriki kwenye shghuli za maendeleo katika halmashauri.

Kwa upande wake Mkuu wa Idara ya Ujenzi wa Nguvu za Pamoja na Harakati kutoka TGNP Bi.Flora Mbaga amesema mdahalo huo ni wa wazi uliojumuisha mbinu za kiragibishi ikiwemo nyimbo na maigizo kwa ajili ya kutoa Elimu ya kuweka wanawake kwenye nafasi za uongozi ,wakionyesha mila na desturi kandamizi ambazo zipo zinavyochangia wanawake kutojitokeza kuwania nafasi za uongozi.

Mdahalo huo umejumuisha makundi ya vijana,wanawake na wanaume kuanzia miaka 18 na kuendelea wakiibua mambo mbalimbali kama mila na desturi kandamizi,baadhi ya wanawake kutojiamini kuwania nafasi za uongozi ,vijana kutoshirikishwa katika utoaji maamuzi ,wanawake kutokupendana wakipendekeza elimu kutolewa kwa jamii juu ya ushiriki wa wanawake katika nafasi mbalimbali za uongozi.

Kata ya Haubi ni miongozi mwa kata 80 nufaika nchini kupitia mradi wa Mwanamke na Uongozi unaofadhiliwa na Mfuko wa Aghakan wenye mlengo wa kubadilisha mtazamo,mila na desturi kandamizi kuhusu ushiriki wa wanawake kwneye nafasi za uongozi.