"MATUNZO BORA KWA MTOTO NI FAIDA KWA TAIFA,TUWAPELEKE KLINIKI KWA WAKATI"DED KONDOA DC

Posted on: July 12th, 2024

Mkurugenzi Mtendaji wa Halmashauri ya Wilaya ya Kondoa Ndg.Shaban Millao mapema tarehe 10/07/2024,amezungumza na akina mama waliojitokeza kuhudhuria kliniki katika Zahanati ya Itundwi kata ya Mnenia.

Ndg.Millao katika ziara yake kwenye zahanati hiyo amewaasa wakina mama kuwapeleka watoto kliniki kwa wakati bila kukosa na kuzingatia maelekezo ya wataalam wa afya.

"Matunzo Bora kwa Mtoto ni faida kwa Taifa Bora tuwapeleke kliniki kwa wakati na kwa kulitambua hilo Mhe.Rais Dkt.Samia Suluhu Hassan anatumia fedha nyingi kuboresha miundombinu na huduma za afya,hivyo tuna kila sababu ya kumuombea Afya njema aweze kutimiza malengo ya kuinua sekta ya afya nchini."amesema Ndg.Millao

Kwa upande wake Afisa Maendeleo ya Jamii Halmashauri Bi.Rahiya Nasser akatumia nafasi hiyo kuwaasa wakinamama waliojitokeza kliniki hapo kuwalea watoto katika maadili mema,kupinga Ukatili dhidi ya watoto pamoja na uzingatiaji wa usalama wao.

Pia kwa upande wake Mganga Mkuu Halmashauri Dkt.Nelson Kimolo amesema jukumu la ulinzi wa mtoto ni la baba na mama na sio kumuachia mama peke yake pamoja na uzingatiaji wa kijikinga na ugonjwa wa Malaria kwa kutumia chandarua chenye dawa.

Sambamba na hilo Ndg.Millao aliambatana na wataalam wengine wa Halmashauri wakiwemo Maafisa Elimu Msingi &Sekondari,Afisa Mipango,Mkaguzi wa Ndani  Uhandisi pamoja na Habari kukagua utekelezaji wa miradi ya maendeleo katika Zahanati hiyo pamoja na Shule ya Sekondari Masange.