*MAMLAKA YA UDHIBITI WA MBOLEA (TFRA) YATOA MAFUNZO KWA MAAFISA UGANI*

Posted on: March 3rd, 2025

Mamlaka ya Udhibiti wa mbolea (TFRA)  imeendesha mafunzo ya kuwawezesha Maafisa Ugani kutoka Halmashauri ya Kondoa  na Kondoa Mji  namna ya kutumia Vishkwambi  katika kuendesha shughuli zao.

Mafunzo haya ya siku moja yamefanyika tarehe 28/02/2025, yakilenga kuwaongezea ujuzi maafisa Ugani hao, kuwajengea uwezo wa kuwasajili wakulima katika mfumo, kuhuisha taarifa za wakulima pamoja na kutoa taarifa sahihi za wakulima kupitia Vishkwambi hivyo.

Msingi wa mafunzo haya ni kurahisisha  huduma zote zinazotolewa na Wizara ya Kilimo kwenda kwa wakulima ikiwemo uuzwaji wa Pembejeo kwa wale wakulima waliokwisha sajiliwa.

Mkufunzi wa mafunzo hayo Ndg. Allan Mariki ambaye pia ni Meneja wa kanda ya kati kutoka Mamlaka ya Udhibiti wa mbolea Tanzania, ameeleza umuhimu wa kutumia Vishkwambi hivyo kwa maafisa Ugani hao. " Moja ya lengo la Kishkwambi hiki, ni kumuwezesha Afisa Ugani kumsajili mkulima kwenye ngazi ya Kata, hivyo ni mategemeo yetu kwamba idadi ya wakulima itaongezeka ndani ya muda mfupi".

 Ndg. Rabeca Amos Robson, Afisa Ugani kutoka Halmashauri ya Kondoa DC, kijiji cha Sakami, ameelezea namna ambavyo wameyapokea mafunzo hayo na namna ambavyo watakwenda kuyafanyia kazi " Tumepokea vizuri mafunzo na yataturahisishia kazi kwa sababu inatupa nafasi ya sisi kuwasajili papo kwa papo"

Akihitimisha mafunzo hayo Meneja wa Kanda ya Kati wa Mamlaka ya Udhibiti wa Mbolea Ndg. Allan Mariki, alisema zoezi hili ni endelevu mara baada ya Maafisa Ugani hao kupokea Vishkwambi hivyo zoezi litakua endelevu kutokana na mbinu mbalimbali za Kiteknolojia zitakavyokua zinakuja.