MAFUNZO YA WASIMAMIZI WA VITUO NA WASIMAMIZI WASAIDIZI JIMBO LA KONDOA YAFUNGWA

Posted on: October 27th, 2025

Mafunzo ya Wasimamizi wa Vituo vya Kupigia kura na wasimamizi wasaidizi katika Jimbo la Kondoa yamefungwa rasmi leo 27,Oktoba katika Ukumbi wa Chuo cha Ualimu Bustani

Akiwasilisha Hotuba ya ufungaji wa Mafunzo hayo kwa niaba ya Msimamizi wa uchaguzi, Afisa Uchaguzi wa Jimbo la Kondoa Bi.Nyegoro Mtaki amewapongeza washiriki wote kwa kuhudhuria, kujifunza na kubadilishana uzoefu katika Sheria, Kanuni na utaratibu wa Tume huru ya Uchaguzi  Nchini.

Sanjari na hayo, Bi.Nyegoro amewapongeza Wakufunzi, wawasilishaji wa mada mbalimbali  na waandaaji wa semina hiyo maalum ya Uchaguzi iliyofanyika kwa Siku tatu Jimboni Kondoa.

Bi.Nyegoro amewasisitiza Wasimamizi na watendaji wa vituo vya kupigia kura kuzingatia na kutekeleza yale yote waliyofundishwa

"Pamoja na uzoefu mlionao katika uchaguzi, zingatieni zaidi Sheria, haswa Sheria mbili mpya ambazo ni sheria ya uchaguzi wa rais, wabunge na madiwani Na.1 ya mwaka 2024 na sheria ya Tume huru ya Taifa uchaguzi Na.2 ya Mwaka 2024"

"Zingatieni pia kanuni inayoruhusu mpiga kura aliyeomba na kuruhusiwa kupiga kura moja tu ya Rais katika vituo mtakavyokuwa mmepangiwa ikiwemo vituo vilivyopo kwenye magereza"

"Nendeni mkatafsiri mafunzo haya, simamieni upigaji kura, hesabuni kura na bandikeni matokeo ya uchaguzi kwa mujibu wa sheria" alisisitiza Bi.Nyegoro

Aidha Bi.Nyegoro Amewatahadharisha Watendaji na wasimamizi hao wa vituo kujiepusha na matumizi mabaya ya mitandao ya kijamii huku akihimiza utekelezaji wa viapo vyao ili kuepuka Mkono Sheria.

Bi.Nyegoro alihitimisha kwa kuwataka watendaji na wasimamizi hao kuwahi mapema katika vituo vyao, kuhakiki na kutunza vifaa vya uchaguzi na kufanya kazi kwa uzalendo katika zoezi lote la uchaguzi.