MAFUNZO YA KKK KWA WALIMU KONDOA DC YATOLEWA

Posted on: February 12th, 2025

Halmashauri ya Wilaya ya Kondoa imetoa mafunzo ya Kusoma, Kuandika na Kuhesabu (KKK) kwa walimu 99 wa darasa la kwanza kutoka shule za msingi katika Ukumbi wa Mikutano Kondoa Irangi uliopo Kondoa Mjini.

Akifungua mafunzo hayo Mkuu wa Divisheni ya Elimu Awali na Msingi Ndg Eugen Shirima amesema lengo la mafunzo hayo ni kuwaandaa walimu wa darasa la kwanza ambao wanafundisha mtaala mpya ulioboreshwa ili kuwajengea msingi bora wa kuwasaidia wanafunzi kumudu vyema stadi za Kusoma, Kuandika na Kuhesabu.

"Matarajio yetu ni kuona mwanafunzi akitoka darasa la awali kujiunga na darasa la kwanza asione utofauti katika usomaji wake, tuhakikishe tunatoka na kitu cha ziada katika mafunzo haya"amesema Mwl.Shirima.

Mafunzo haya ni ya siku tatu yakiwezeshwa kupitia Wizara ya Elimu, OR TAMISEMI kwa kushirikiana na Programu ya Shule Bora chini ya ufadhili wa Serikali ya Uingereza UKAID yakilenga kuwajengea uwezo walimu 99 wa darasa la kwanza mafunzo ya Kusoma,Kuandika na Kuhesabu (KKK) kuendana na mtaala ulioboreshwa.

Kwa siku ya kwanza walimu hao wamejifunza mada mbalimbali zikiwemo; mapitio ya Sera ya Elimu na mtaala ulioboreshwa, kutambua sauti za herufi, kutambua uhusiano wa sauti na herufi pamoja na kusoma kwa ufasaha na kusikiliza kwa ufahamu.