MAFUNZO KWA MAKARANI WAONGOZAJI WAPIGA KURA 2025 KONDOA DC YAFUNGULIWA

Posted on: October 25th, 2025

Msimamizi wa Uchaguzi Jimbo la Kondoa Wakili msomi Ndg. Mashauri .M. Vicent amefungua mafunzo kwa makarani waongozaji wapiga kura kwa Jimbo hilo katika Ukumbi wa Chuo cha Bustani leo Oktoba 25, 2025

Katika hotuba yake ya ufunguzi Ndg. Mashauri amewapongeza Makarani hao kwa kuteuliwa kwao, na kuwahimiza kutimiza wajibu wao kama ilivyo ainishwa katika sheria kifungu cha 76, cha Sheria ya Uchaguzi wa Rais, Wabunge na Madiwani Na.1 ya mwaka 2024.

"Ni vyema mkatambua kwamba, kwa kuzingatia masharti ya ibara ya 74(6) ya Katiba ya Jamhuri ya Muungano wa Tanzania ya mwaka 1977,Tume huru ya Taifa ya Uchaguzi ndiyo yenye jukumu la kusimamia na kuratibu uendeshaji wa Uchaguzi wa Rais na Wabunge wa Jamhuri ya Muungano na Madiwani kwa Tanzania Bara"

"Mnategemewa kuzingatia Sheria, Kanuni na maelekezo mtakayopewa hadi hapo tutakapo kamilisha jukumu hili la Uchaguzi Mkuu" Alisisitiza Ndg. Mashauri

Aidha Ndg. Mashauri amewataka Watendaji, na Makarani waongozaji wapiga kura wapatao 419 watakaofanya shughuli za Uchaguzi katika Vituo 406 vilivyopo katika kata 21 za Halmashauri ya Wilaya ya Kondoa, kusoma na kuielewa vyema katiba na kanuni za Uchaguzi, kujiepusha kuwa vyanzo vya malalamiko kutoka kwa vyama vya siasa, kukagua na kuhakiki pamoja na kutunza vifaa vya uchaguzi na kushirikiana na mawakala, wasimamizi wa Uchaguzi pale ambapo itakapotakiwa kufanya hivyo.

Sanjari na hayo, Ndg. Mashauri Ameshuhudia viapo vya Watendaji na Makarani hao huku akiwakumbusha kuzingatia vyema matakwa ya Sheria ya Tume Huru ya Taifa ya Uchaguzi Na.2 ya mwaka 2024.

Kwa upande wake Mwenyekiti wa Makarani waongozaji wapiga kura jimbo la Kondoa Ndg. Manase Munuo ameshukuru juu ya mafunzo hayo na kuahidi kutekeleza shughuli zote za uchaguzi kwa weledi, uzalendo na kwa kufuata sheria na kanuni za uchaguzi.

" kwa niaba ya makarani wenzangu, tumepokea mafunzo haya na tuko tayari kusimamia zoezi la uchaguz vyema" aliongeza Ndg.Munuo

Uchaguzi Mkuu wa Tanzania unatarajiwa kufanyika Oktoba 29, huku ukiwa na kauli mbiu "Kura yako, Haki yako, Jitokeze kupiga Kura"