LISHE BORA KWA WATOTO NA KUTOWAFICHA WATOTO WENYE MAHITAJI MAALUM MAJUMBANI VYAHIMIZWA -KATA YA HONDOMAIRO

Posted on: September 6th, 2024

Wananchi wa Kata ya Hondomairo kupitia siku maalum ya kuongea na wazazi na wanafunzi wanaohitimu Elimu ya Msingi shule za Dorasi, Hondomairo, Mwembeni, Isari, Swagaswaga na Misreyi wamehimizwa kuzingatia lishe kwa watoto pamoja kutokuwaficha watoto wenye mahitaji maalum majumbani mwao.

Wito huo umetolewa na Mkurugenzi Mtendaji wa Halmashauri ya Wilaya ya Kondoa Ndg.Shaban Millao ambaye alikuwa Mgeni rasmi wa siku hiyo maalum ya wanafunzi wa Shule za Msingi za kata ya Hondomairo akiwahimiza wazazi kuchangia huduma ya Chakula kwa wanafunzi wa madarasa yote badala ya wanafunzi wa madarasa ya mitihani pekee. Amewaasa Wazazi kuacha tabia ya kuwaficha majumbani watoto wenye mahitaji maalum akisema ni kuwanyima haki yao ya msingi kama watoto wengine pamoja na malezi Bora kwa watoto.

"Serikali ya awamu ya sita chini ya Mhe.Rais Dkt Samia Suluhu Hassan imetoa zaidi TSh.Bil 9 katika Elimu kwa halmashauri yetu zikitumika kuboresha miundombinu ya Elimu, matarajio ni kuona watoto wanapelekwa shule na wanafanya vizuri" amesema "kufanya hivyo ni kumuunga Mkono Mhe. Rais" amemalizia Ndg. Millao.

Kwa upande wa Wahitimu, Ndg. Millao amewataka kujiandaa vyema dhidi ya Mtihani wa kuhitimu Elimu ya Msingi utakaofanyika tarehe 11 hadi 12 mwezi Septemba 2024 wakisoma kwa bidii na kuahidi kutoa zawadi kwa wanafunzi watakaopata alama A katika masomo yote. Pia amewaasa kuwa na subira na tamaa zisizokuwa na muhimu kwani hiyo ni hatua moja bado wanaingia katika hatua ambayo ni ngumu kwao na kwamba wanahitaji kukataa vishawishi vyovyote vitakavyowafanya kukatisha ndoto zao.

Sambamba na suala la elimu, Ndg.Millao amewagusia wananchi wa kata hiyo juu ya upandaji na utunzaji wa miti 20  kwa kila kaya ili kulinda mazingira yetu, amewaomba pia kujitokeza kwa wingi kujiandikisha, kuchagua na/kuchaguliwa katika Uchaguzi wa Serikali za Mitaa mwaka 2024. Jambo lingine ambalo Ndugu Millao amelisisitiza ni suala la usalama wa jamii yetu kwa kuwataka kuwatambua wageni wanaofika kwenye maeneo yao kutoa taarifa ofisi za vitongoji na kijiji ikiwa ni pamoja na kuwaandikisha katika daftari maalumu la wageni. pamoja na kuwapongeza Walimu pia amewaasa wakulima kutumia Mfumo wa Stakabadhi ghalani ili kuongeza tija ya mazao ya kimkakati Ikiwemo Mbaazi na Dengu. Amewaeleza faida ya kutumia mfumo huo kwa wakulima wenyewe na si madalali.

Mkurugenzi kabla ya kuanza kwa hafla hiyo alianza kwa kusikiliza na kutatua kero za wazee wa kata hiyo.

Shule za Msingi kata ya Hondomairo zinasifika kwa kufanya vizuri katika mitihani ya Taifa, katika Mtihani wa Pre-Necta mwaka 2024 shule ya msingi Misrey na Swagaswaga zilipata ufaulu wa 100% na 93%

Pia katika mwaka wa masomo 2024 jumla ya Wahitimu 272(Wasichana 150 na Wavulana122) kutoka shule hizo wanatarajiwa kufanya Mtihani wa kuhitimu Elimu ya Msingi.