"KONDOA KUPATA MVUA ZA WASTANI HADI CHINI YA WASTANI MSIMU MPYA WA KILIMO 2024/2025 "NDG.JUVENAL MUNISHI

Posted on: November 8th, 2024

Wananchi wa Halmashauri ya Wilaya ya Kondoa wameaswa kuanza kufanya maandalizi ya mapema mashambani katika kuelekea msimu mpya wa kilimo.

Hayo yamesemwa na Mkuu wa Divisheni ya Kilimo, Mifugo na Uvuvi Ndg.Juvenal Munishi katika mahojiano maalum, akielezea muelekeo wa hali ya mvua wilayani Kondoa kwa mujibu wa taarifa kutoka Mamlaka ya Utabiri wa Hali ya Hewa msimu wa mvua 2024/2025 Kondoa itapata mvua za wastani hadi chini ya wastani  kukiwa na uwezekano mkubwa wa kupata mvua chini ya mm 600 ambazo zinachagua mazao ya kustawi.

"kwa kawaida huwa tunapata mvua za mm 620 mpaka mm 650 kwa mwaka na kwa mujibu wa Mamlaka ya Utabiri wa Hali ya Hewa kuna uwezekano mkubwa wa kupata mvua chini ya mm 600 ambazo huchagua mazao ya kustawi kutokana na mtawanyiko wake" amesema Ndg.Munishi.

Ndg.Munishi ametoa rai kwa wananchi, wakulima na wafugaji kuzitumia kwa umakini mkubwa unyeshaji wa mvua ili kuepukana na adha ya kukosa chakula na malisho ya mifugo kwa kufanya maandalizi ya mashamba mapema.

Ndg.Munishi ameongeza akielezea juhudi za serikali kuendelea kuwasogezea mbegu na mbolea ya ruzuku hadi kuanzia wiki ya pili ya mwezi Novemba mbolea ya ruzuku na mbegu kuanza kutolewa katika vituo elekezi vilivyopo halmashauri.

Mbolea ya Ruzuku itakayolewa ni ya kupandia (DAP), mbegu za mazao tofauti ikiwemo mahindi ya muda mfupi na mbegu ya alizeti (hybrid)inayouzwa kwa Sh 35,000 @ kilo moja ambayo Serikali imechangia sh 25,000 ikimpa nafasi mkulima kulipa sh10,000 tu kupata mbegu hiyo kwa wakulima waliojisajili kwenye mfumo wa mbolea na mbegu za ruzuku.