KONDOA DC YAPATA HATI SAFI MIAKA MITATU MFULULIZO

Posted on: June 26th, 2024

Halmashauri ya Wilaya ya Kondoa imepata Hati safi kwa kipindi cha miaka mitatu(3) mfululizo 2020/2021,2021/2022 na 2022/2023 ikiwa na jumla ya hoja 48.

Hayo yamesemwa katika Kikao cha Baraza la Madiwani likipokea na kujadili hoja za Mdhibiti na Mkaguzi Mkuu wa Hesabu za Serikali kwa kipindi cha mwaka wa fedha unaoishia Juni 30,2023.

Bw.Karimu Mwinyimbegu ambaye ni Mkaguzi Mkuu wa Hesabu za Nje Mkoa wa Dodoma amesema Halmashauri ya Wilaya ya Kondoa imepata hati safi kupitia jumla ya hoja 48(Kisera 3,Kisheria 4 na zinazohitaji utekelezaji wa Halmashauri ni 41) na hadi kufikia sasa jumla ya hoja 15 zimependekezwa kufungwa baada ya Halmashauri kuwasilisha majibu ya Uongozi na Mpango wa utekelezaji wa mapendekezo ya Mkaguzi kwenye Ofisi ya Mkaguzi Mkuu wa Nje.(CEA -Dodoma).

Kwa upande wake Mkuu wa Mkoa wa Dodoma Mhe.Rosemary Senyamule ameipongeza Halmashauri ya Wilaya ya Kondoa kwa kupata hati safi kwa mara ya tatu mfululizo akiitaka kuwachukulia hatua wanaosababisha hoja za uzembe.

Naye Mkuu wa Wilaya ya Kondoa Mhe.Fatma Nyangassa ametumia nafasi hiyo kujitambulisha baada ya kufanyika mabadiliko ya uhamisho uliofanywa na Mhe.Rais Dkt.Samia Suluhu Hassan akimpangia nafasi hiyo katika Wilaya ya Kondoa, amesema ufatwaji wa taratibu na kuwajibika ipasavyo katika utekelezaji wa shughuli za maendeleo utasaidia halmashauri kutopata hoja bila sababu za msingi.

Ndg.Shaban Millao ambaye ni Mkurugenzi Mtendaji Halmashauri ya Wilaya ya Kondoa kwa niaba ya watumishi ameahidi kutekeleza hoja zilizobainishwa na mkaguzi kuzifanyia kazi kwa weledi hoja zilizo chini ya uwezo wa halmashauri kuzimaliza.

Akihitimisha kikao hicho Mwenyekiti wa Halmashauri Mhe.Abdalah Maguo amesema Halmashauri ya Wilaya ya Kondoa kupitia kamati ya fedha imedhamiria kutokua na hoja ikipanga kumwezesha Mkaguzi wa Ndani katika kuhakikisha anatekeleza shughuli zake ipasavyo katika kuikoa halmashauri kuepukana na hoja za Mkaguzi wa Nje.