KONDOA DC YANUNUA MASHINE ZA VIRUTUBISHI KUKUZA HALI YA LISHE KWA WANAFUNZI NA JAMII

Posted on: January 6th, 2025

Kamati ya lishe Halmashauri ya Wilaya ya Kondoa imepokea taarifa ya ununuzi wa Mashine maalum za Virutubishi zitakazosaidia kukuza hali ya Lishe Bora kwa Wanafunzi na Jamii.

Akiwasilisha taarifa yake kwa kamati hiyo iliyoketi kwa ajili ya Kikao cha Maandalizi ya Mpango wa Bajeti ya Lishe mwaka wa fedha 2025/2026 Afisa Lishe Ndg.Khamis Faki amesema halmashauri imenunua na kufunga mashine mbili za virutubishi kutoka Kampuni ya SANKU zenye Thamani ya Tsh Mil 3 na Laki 2 kwa kata ya Soera na Bereko kwa ajili ya wanafunzi na jamii ambazo zimefungwa katika viwanda vidogo vidogo vya kusaga unga wa mahindi.

Ndg.Faki amesema matarajio ya halmashauri ni kuongeza mashine 6 kati ya 8 zitakazofungwa kata za Kikore, Kisese,Pahi,Bumbuta,Busi na Thawi ambazo matarajio yake ni kuzinufaisha Shule za Msingi na Sekondari pamoja na jamii kwa ujumla juu ya kuongeza thamani ya chakula chenye mchanganyiko wa virutubishi lengo likiwa ni kukuza hali ya lishe bora kwa jamii.

Sambamba na ununuzi wa mashine hizo halmashauri imefanikiwa kuwaibua na kuwatibu watoto wenye utapiamlo mkali kwa 100%,Utekelezaji wa kampeni ya Utoaji wa Matone ya Vitamin A na Dawa za Minyoo ambapo watoto chini ya miaka 5 wamefikiwa  kwa 118% pamoja na uongezekaji wa idadi ya wanafunzi wanaopata chakula shuleni kutoka 51% mwaka 2023/2024 hadi 75% kwa kipindi cha mwezi Julai hadi Disemba 2024.

Pia kamati imepokea taarifa ya fedha iliyotengwa kwa kipindi cha mwaka 2024/2025 ,Tsh 108,593,383.75/=na kilichotumika ni Tsh. 27,723,000 sawa na asilimia 25.5 ikikubaliana kujikita katika vipaumbele mbalimbali ikiwemo kila Divisheni kutoa fedha za lishe kama zilivyopangwa,kuongeza Idadi ya wanafunzi wanaopata chakula shuleni,kuongeza idadi ya shule na kaya  zenye bustani za mbogamboga na miti ya matunda pamoja na Ufugaji wa samaki na Wanyama kwa ajili ya lishe.

Kikao hicho kimewakutanisha wajumbe kutoka Ofisi ya Mkurugenzi ikizijumuisha Divisheni ya Afya, Lishe na Ustawi wa Jamii, Elimu Awali na Msingi,Elimu Sekondari, Kilimo,Mifugo na Uvuvi pamoja na Divisheni ya Maendeleo ya Jamii.