KONDOA DC YAJIPAMBANUA UFAULU MATOKEO YA MOCK MKOA 2025

Posted on: July 12th, 2025

Wataalam wa Elimu Halmashauri ya Wilaya ya Kondoa wamefanya Tathimini ya pamoja dhidi ya Mtihani wa Utamilifu (MOCK)kwa wanafunzi Darasa la Saba.

Akiongoza kikao hicho Mkuu wa Divisheni ya Elimu Awali na Msingi, Mwl.Eugen Shirima amesema lengo la tathmini hiyo ni kujiwekea  mikakati mipya katika kipindi cha muhula wa pili wa masomo  kuelekea ufanyikaji wa mtihani wa taifa darasa la Saba ili kuongeza ufaulu kupitia kipimo cha Mtihani wa Utamilifu uliofanyika mwezi wa tano.

"Matokeo haya ya MOCK Mkoa yametupa 77.9% ambayo ni zaidi ya ufaulu wa kitaifa mwaka 2024 ambayo yalikua 76%, tunataka mwaka huu kuvuka zaidi ya hatua 10 mbele.kupitia matokeo hayo yanatulazimu kuongeza juhudi kubwa kuwasaidia wanafunzi wetu kufanya vizuri."alisema Mwl.Shirima.

Mwl.Shirima amesema halmashauri imejiwekea malengo ya  kufikia asilimia 95% ya ufaulu ikisimamia mpango mkakati wa Mkoa wa Dodoma dhidi ya kauli mbiu isemayo "Uwajibikaji wangu ndio Msingi wa kuinua Ubora wa Elimu na Ufaulu Dodoma ".

Tathmini hiyo imefanyika ikiwakutanisha Walimu Wakuu, Maafisa Elimu Kata na Halmashauri ikiwa ni baada ya kufanyika kwa Mtihani wa Utamilifu kwa darasa la saba(7) mwaka 2025 uliofanyika tarehe 21 hadi 22 mwezi Mei kwa jumla ya watahiniwa 3,735 sawa na asilimia 77.9 waliofanya mtihani huo wamepata madaraja A,B na C.Wavulana waliofaulu ni 1,533 sawa na asilimia 41.0 na wasichana ni 2,202 sawa na asilimia 58.9.