KONDOA DC YAADHIMISHA JUMA LA ELIMU YA WATU WAZIMA KWA KISHINDO

Posted on: August 21st, 2025

Halmashauri ya Wilaya ya Kondoa imeadhimisha Juma la Elimu ya Watu Wazima yakiwakutanisha wadau wa elimu, wazazi na jamii.

Hayo yamejiri Agosti 16,2025 katika kata ya Kikilo iliyopo katika Halmashauri ya Kondoa, wakipata fursa ya kuona shughuli mbalimbali zinazofanywa na sekta ya Elimu ya Wazima kiwilaya.

Akifungua maadhimisho hayo kwa niaba ya Mkuu wa Wilaya ya Kondoa, Ndg.Lazaro Molel, ambaye pia Afisa Tarafa, Tarafa ya Bereko amesema elimu ya watu wazima ni nguzo muhimu kwa maendeleo ya mtu binafsi na maendeleo ya jamii nzima kwa kujipatia stadi mpya, kuendeleza kwa ufanisi zaidi akifanyacho.

Kwa upande wake Afisa Elimu Sekondari Mwl.Estomih Nkwera amesema malengo ya wiki ya juma la elimu ya watu wazima yanahusisha ufanyikaji wa tathmini ya shughuli zote za elimu ya watu wazima katika Halmashauri ili kuweka malengo na mikakati inayotekelezeka kwa kuwakutanisha wadau mbalimbali wa elimu pamoja ili kuona mafanikio na changamoto zinazoikabili elimu ya watu wazima na elimu nje ya mfumo rasmi.

Maadhimisho haya yamekwenda sambamba na michezo na maonyesho mbalimbali, upokeaji wa taarifa za mafanikio na changamoto za elimu ya watu wazima kwa kuongozwa na kauli mbiu isemayo" Kukuza Kisomo katika zama za kidijitali kwa maendeleo endelevu ya Taifa letu".

Kwa mujibu wa Sensa ya Kisomo ya Halmashauri ya Oktoba 2022 kati ya watu 244,254 watu 11,461sawa na asilimia 4.7% hawajui kusoma, kuandika na kuhesabu kwa kulitambua hilo Serikali ya Awamu ya Sita chini ya Mhe.Rais Dkt Samia Suluhu Hassan imefanikiwa kufungua vituo 9 vya MEMKWA katika kipindi cha mwaka 2022-2025, Jumla ya wanafunzi 141 wakiwemo wavulana 73 na wasichana 68 wamefaulu kutoka kwenye mfumo usio rasmi na kujiunga katika mfumo rasmi wa elimu, walimu 46 kati ya 80 waliosajiliwa katika programu ya kisomo  cha kujiendeleza wamehitimu elimu ngazi ya stashahada ya Elimu ya Watu Wazima na Elimu endelevu.

MEMKWA (Mpango wa Elimu Msingi kwa waliokosa )ni programu ambayo inajikita katika kutoa elimu kwa vijana waliochelewa kujiunga na elimu ya Msingi katika mfumo rasmi kutokana na sababu kadha wa kadha kama vile kuhamahama kwa wazazi ambapo walengwa wa Programu ni kuanzia umri wa miaka 9-13.