KITABU CHA "DUNIA YANGU BORA" KUTUMIKA MRADI WA STADI ZA MAISHA KONDOA

Posted on: May 20th, 2024

Serikali kwa Kushirikiana na Shirika lisilo la Kiserikali CAMFED kupitia mradi wa Programu ya Stadi za Maisha unaoinufaisha mikoa 10 Tanzania Bara limeidhinisha kitabu cha "Dunia yangu Bora" kuanza kutumika mwaka 2025 kufundishia Wanafunzi wa kidato cha kwanza.

Hayo yamebainishwa katika mafunzo ya muda wa siku 2 kwa Maafisa Elimu Kata,Wakuu wa Shule na Walimu Walezi katika Ukumbi wa Mikutano Kondoa Irangi Kondoa Mjini yakiwataka kuandaa mchakato utakaosaidia kupata wawezeshaji wa kujitolea kufundisha somo hilo litakalosaidia wanafunzi kujitambua,kuelimikakuthaminika n.k.

Wito huo umetolewa na Bi.Clara Joseph ambaye ni Mratibu wa CAMFED Mkoa wa Dodoma amesema "kitabu kina mada ambazo zitamwezesha mwanafunzi kujitambua, kumuongezea ufaulu katika masomo yake kupitia mchakato wa kupata wawezeshaji watakaopata mafunzo kuanzia umri wa miaka 18 hadi 25.

Kitabu hicho kimegawanyika katika sehemu kuu mbili "Ustawi na Uwezo ambazo ni Dhana ya mahitaji ya Msingi ya Binadamu, Dunia Tunamoishi,Dunia Asilia, Marafiki, Haki sheria na mila, kuwa vizuri na kufanya vizuri n.k.

Aidha katika mafunzo hayo suala la Sera ya Ulinzi wa Mtoto na kanuni za utekelezaji limehamasishwa kwa jamii  kuwalinda na kuwaepusha watoto kuingia katika mazingira ya kudhalilishwa, wakijengewa uhakika wa kushughulikia hali hizo.

Kwa niaba ya wapokea mafunzo hayo Afisa Elimu kata ya Pahi Mw.Adam Faraji amesema wamejifunza kitu kipya ambacho hawakujifunza awali, waliahidi kwenda kuutekeleza zaidi ya asilimia 100% tofauti na maeneo mengine waliopokea mafunzo.

Akifunga mafunzo hayo kwa niaba ya Ofisi ya Mkurugenzi Afisa Elimu ya Watu wazima ndugu Estomihi Nkwera ametoa shukrani za dhati kwa waandaaji wa mafunzo hayo pamoja na utayari wa upokeaji mafunzo kwa wapokea mafunzo akiamini mafunzo hayo yataenda kuwabadilisha wanafunzi ili kuwaongezea hari ya kupenda kusoma, kupata tiba ya mdondoko kitaalum na kupunguza/kufuta utoro.

Baada ya kukamilika kwa mafunzo hayo kwa wataalam wa elimu ngazi ya halmashauri, mchakato utakaofuata ni kutafuta wawezeshaji watakaojitolea  katika shule za Sekondari kufundisha programu hiyo kuanzia Januari 2025, utaratibu wa matangazo ya ajira hizo utaandaliwa na Halmashauri Divisheni ya Elimu Sekondari kwa kufuata vigezo lengwa  kabla ya mradi kuanza mapema mwakani.