KIONGOZI MKIMBIZA MWENGE WA UHURU MWAKA 2024 AKAGUA MSITU WA SALANGA NA UFUGAJI WA NYUKI KONDOA DC

Posted on: July 3rd, 2024

Kiongozi Mkimbiza Mwenge wa Uhuru mwaka 2024 Ndg.Godfrey Mnzava pamoja na ujumbe wa Mwenge wametembelea Msitu wa Salanga na Ufugaji nyuki uliopo kijiji cha Masawi kujionea shughuli za Uhifadhi.

 Viongozi hao wamejifunza kuhusiana na shughuli zinazofanyika ndani ya msitu ikiwemo ufugaji wa nyuki,mafunzo ya ufugaji nyuki kwa vitendo,kutunza vyanzo vya maji,uimarishaji wa mipaka na doria ili kudhibiti migogoro ya matumizi ya ardhi kwenye hifadhi.

Hifadhi ya Msitu wa Salanga ni hifadhi  inayomilikiwa na Serikali Kuu,na kusimamiwa na Wakala wa Huduma za Misitu Tanzania (TFS) chini ya Wizara ya Maliasili na Utalii ambayo ilitangazwa kupitia gazeti la serikali na.294 mwaka 1941 na Serikali ya Kikoloni ya Mwingereza kama ilivyooneshwa kwenye ramani yenye Jb na 63 yenye ukubwa wa Hekta 8,665.72.

Miongoni mwa faida zilizopo katika msitu huo ni kuwepo kwa  makingio ya maji mtiririka kwenye hifadhi yanayowanufaisha wananchi 14,204 kutoka vijiji vya Itololo,Kandaga,Mapinduzi, Disa,Masange na Kisese Sauna,Wananchi kushiriki shughuli za ufugaji nyuki kwenye hifadhi ya misitu ambapo jumla ya vikundi viwili vyenye jumla ya watu 48 vimetundika mizinga 70 kwenye hifadhi.

Mbio za Mwenge wa Uhuru mwaka 2024 zinabebwa na ujumbe usemwao "Tunza Mazingira na Shiriki Uchaguzi wa Serikali za Mitaa kwa Ujenzi wa Taifa Endelevu ".