KAMATI YA LISHE KONDOA DC YAFANYA ZIARA YA KIUTENDAJI

Posted on: January 22nd, 2026

Kamati ya Lishe ya Halmashauri ya Wilaya ya Kondoa imefanya ziara ya kiutendaji yenye lengo la kufuatilia shughuli za lishe Wilayani Kondoa.

Akiongoza Ziara hiyo, Mwenyekiti wa Kamati ya Lishe Wilaya kwa niaba ya Mkurugenzi Mtendaji wa Halmashauri ya Wilaya ya Kondoa Ndg. Peter Ngumuo ameambatana na Wajumbe 10 wa kamati hiyo kutembelea Kata ya Soera ikiwa ni pamoja na Vijiji vya Bukulu, Soera, Humai na kwa Dinu.

Kamati hiyo imepitia Afua za Lishe ikiwemo mashamba na bustani mahususi ya lishe Shuleni, ripoti ya uimarishaji wa lishe bora katika vituo vya afya, pamoja na mashine za vinyunyizi vya virutubisho Wilayani hapo.

Akizungumza wakati wa Ziara hiyo, Afisa Lishe Wilaya Ndg. Khamis Faki amesema kuwa Afua za lishe Wilayani hapo zinaendelea vizuri kutokana na makadirio ya Wanafunzi wanaopata lishe bora shuleni.

Aidha, Ndg. Faki, ametoa rai kwa waalimu kuhifadhi nafaka juu ya chanja ikiwa hiyo ni njia salama sanjari na matumizi ya chumvi zenye madini joto ( iodine) ili kuepuka magonjwa ya rovu na mengineyo.

Kwa upande wake Mganga Mfawidhi wa Zahanati ya Bukulu Bi.Jerida Josephat, amebainisha namna ambavyo kituo chake kinawahudumia wananchi  kwa kutoa elimu juu ya masuala ya lishe bora.

" pamoja na kutoa elimu ya lishe bora, tunatoa dawa za minyoo na matone ya Vitamini A kutokana na umri husika"

"Kwa mwezi wa Disemba tumehudumia Watoto wenye mashauri ya utapiamlo ambapo Watoto 587 wenye umri kati ya miezi 6-11(199) na wale wenye miezi 12-59 (388) na kuvuka makadirio katika muda husika"  aliongeza Bi Jerida

Pamoja na mambo mengine Mwenyekiti wa kamati hiyo Ndg. Ngumuo amewaasa Wananchi kujitoa na kuchangia huduma za chakula shuleni ili kuongeza ufaulu kwa Watoto wao.