KAMATI YA FEDHA YATEMBELEA NA KUKAGUA MIRADI YA ELIMU KONDOA DC

Posted on: October 30th, 2024

Halmashauri ya Wilaya ya Kondoa kupitia Kamati ya Fedha imetembelea na kukagua miradi ya maendeleo katika shule za Sekondari Mnenia, Kisese na Bukulu.

Akiongoza kamati hiyo Makamu Mwenyekiti wa Halmashauri Mhe.Salum Mabote, wamekagua Mradi wa ujenzi wa Shule mpya ya Sekondari Mnenia (Kata ya Mnenia), Ujenzi wa vyumba viwili vya Madarasa na Mabweni mawili (Kata ya Kisese na Soera) ambayo miradi yote mitatu inatekelezwa kwa fedha za Serikali kuu kupitia mpango wa Tanzania Secondary Education Quality Improvement Project (SEQUIP).

Mhe.Mabote ameanza kwa kupongeza jitihada  kubwa zinazofanywa na Serikali ya awamu ya Sita chini ya Mhe.Rais Dkt Samia Suluhu Hassan katika kuimarisha Sekta ya Elimu nchini kwa kutoa fedha nyingi katika ujenzi wa vyumba vya madarasa, ofisi, maktaba, maabara, mabweni, vyoo n.k, akisisitiza usimamizi bora wa miradi hiyo ikiendana na thamani halisi ya fedha pamoja na kukamilika kwa wakati.

Katika mradi wa ujenzi wa shule mpya ya Sekondari Mnenia Jumla ya Sh.544,225,626.00 zimetolewa na Serikali kuu kwa ajili ya ujenzi wa jengo la utawala, vyumba viwili vya madarasa, Ofisi ya Walimu, jengo la Maabara ya Biolojia, Kemia & Fizikia, Maktaba, Chumba cha TEHAMA, Kichomea taka,

tanki la maji na vyoo vya wanafunzi (Wavulana matundu 4 na Wasichana matundu 4 yakijumuisha na vya wanafunzi wenye mahitaji maalum.

Mradi huu wa Sekondari ambao awali ulianzishwa kwa nguvu za wananchi kwa thamani ya Tsh Mil 20 ulipata ufadhili kutoka Mfuko wa Maendeleo ya Jamii TASAF Tsh Mil 113 kabla ya Halmashauri ya Wilaya ya Kondoa kuongeza Tsh Mil 25 na hatimae Serikali kuu inayoongozwa na Mhe.Rais Dkt.Samia Suluhu Hassan kutoa fedha.