JUMLA YA TANI 215.4 ZA UFUTA ZAUZWA KWA MNADA WA KIDIJITALI KATIKA GHALA LA KATA YA KWADELO KONDOA DC

Posted on: June 17th, 2025

Wakulima wa Zao la Ufuta katika Halmashauri ya Wilaya ya Kondoa wamefanikiwa kuuza jumla ya Tani 215.4 ya zao hilo kwa Mnada wa Kidigitali katika Kata ya Kwadelo kupitia mfumo wa Stakabadhi za Mazao ghalani.

Haya yamejiri ikiwa ni baada ya Tangazo la Serikali kupitia mwongozo wa Biashara ya Mazao ya Dengu, Mbaazi, Soya na Ufuta toleo na 3.2025 uliotolewa kwa pamoja chini Udhibiti wa nafaka na Mazao mchanganyiko (COPRA), Tume ya Maendeleo ya Ushirika (TCDC), Bodi ya Usimamizi wa Stakabadhi za maghala (WRRB) na Soko la Bidhaa Tanzania (TMX). Serikali ikielekeza mazao haya yauzwe kupitia mfumo wa Stakabadhi ghalani chini ya Usimamizi wa ushirika wa kilimo na Masoko (AMCOS).

Kupitia Mfumo huu wa Stakabadhi ghalani wakulima kutoka Chama cha NGUVU MOJA AMCOS kilichopo kata ya Itaswi wameshuhudia Ununuzi na uuzaji wa zao la ufuta kwa njia ya kidijitali ambapo Bei ya Ufuta imenunuliwa kwa Tzs 2,310 kwa kilo sawa na Tzs 497,553,210/= zilizotokana na wakulima hao kuuza jumla ya Tani 215.4 za zao hilo.

Sambamba na zoezi hilo Elimu dhidi ya Matumizi ya Mfumo huo wa Stakabadhi ghalani umeendelea kutolewa kwa wakulima wa zao hilo ili kupata uelewa wa pamoja ukilenga kuwanufaisha wakulima hao.

Mnada huu wa zao la Ufuta  umefanyika katika Halmashauri zingine za Mkoa wa Dodoma ikiwemo Dodoma Jiji pamoja na Chemba DC , jumla ya Kilogram 1,353,984 zikiuzwa kupitia Mfumo wa Stakabadhi ghalani kwa mkoa wa Dodoma mapema Juni 14,2025 katika Halmashauri hizo za Kondoa DC,Chemba Dc na Dodoma CC

Zoezi hili ni endelevu kwa mazao ya kimkakati,wakulima wote wanahamasishwa kuendelea kupeleka zao la ufuta katika maghala yaliyo karibu nayo.