ELIMU YA MLIPA KODI YATOLEWA KWA WADAU WILAYA YA KONDOA

Posted on: October 1st, 2024

Mamlaka ya Mapato Tanzania (TRA)-Wilaya ya Kondoa imetoa semina ya elimu ya mlipa kodi kwa wafanyabiashara,taasisi za umma na binafsi pamoja na  wananchi kwa ujumla, katika  ukumbi wa mikutano wa Kondoa Irangi uliopo Kondoa Mjini.

Akizungumza katika semina hiyo kwa niaba ya Mkuu wa Wilaya ya Kondoa Mhe.Fatma Almas Nyangasa, Afisa Tarafa ya Kondoa Mji Ndg.Ally Mbena amewataka wapokea taarifa za siri kutoka TRA kuziishi kwa kuwalinda watoa taarifa dhidi ya wakwepa kodi na kuepuka tabia ya kufichuana.

Ndg.Ally ameongeza katika kuelekea Uchaguzi wa Serikali za Mitaa mwaka 2024 wananchi wa wilaya ya Kondoa wenye umri kuanzia miaka 18 kutumia fursa ya kushiriki kujiandikisha, kugombea nafasi mbali mbali za uongozi mbalimbali, kuchagua viongozi bora kwa maslahi ya Taifa kwa kupiga kura na kuwataka wananchi kuwa mabalozi wazuri wa kukemea ukatili wa kijinsia.

Awali kabla ya kumkaribisha mwakilishi kutoka ofisi ya Mkuu wa Wilaya, Meneja Mamlaka ya Mapato Tanzania (TRA-KONDOA)Ndg.Mohamed Kapera amesema wameridhishwa na kuhamasika juu ya mahudhurio makubwa ya wadau waliojitokeza katika semina hiyo ya kujifunza juu ya Elimu ya Mlipa Kodi, kuuliza maswali kuhusu TRA akiahidi kutoa ushirikiano kwa wateja na watoa taarifa dhidi ya wakwepa kodi nchini bila kuwataja watoa taarifa hizo kwa umma.

Kwa upande wake Afisa Msimamizi wa Kodi Mkuu Mkoa wa Dodoma, Ndg.Filipo Eliamini alisema lengo la semina hiyo ni kutoa ufahamu dhidi ya ulipaji wa kodi na matakwa mbalimbali ya kisheria,kuwakumbusha wajibu wa kutekeleza sheria za kodi,ukataji na uwasilishaji wa kodi ya zuio kwa watumishi wa serikali kupitia miradi pamoja na kutoa msisitizo kwa watoa na wapokea huduma kutoa na kudai risiti baada kufanya manunuzi mbalimbali.

Ndg.Eliamini ameongeza"niwasisitize tulipe kodi kwa wakati kuepuka riba,tunapolipa kodi tunaisadia Serikali katika kuendeshe nchi yetu  ikitekeleza miradi mbalimbali ya maendeleo kwa maslahi ya Taifa ".