ELIMU YA BAJETI YA MLENGO WA KIJINSIA KUINUFAISHA KONDOA

Posted on: June 26th, 2025

Timu ya Waraghibishi Halmashauri ya Wilaya na Mji Kondoa imejengewa uwezo wa Elimu ya Bajeti yenye Mlengo wa Kijinsia.

Elimu hii inalenga kuwawezesha Wanawake, Wanaume na Vijana kutoka Vitongoji, Vijiji, Mitaa, Kata na Mamlaka za Serikali za mitaa ili washiriki kikamilifu katika kupanga na kufuatilia Uibuaji na Upangaji wa Vipaumbele na Mipango ya Bajeti katika Halmashauri kwa mtazamo wa kijinsia.

Akitoa elimu hiyo kwa Waraghibishi hao Mwezeshaji wa Jamii katika Masuala ya Kijinsia Ndg.Deogratius Temba amesema faida ya elimu hiyo inalenga kuwaandaa washiriki kama waelimishaji rika katika vijiji vyao ili waweze kufikisha uelewa huo kwa jamii na kuisaidia kupanga kwa pamoja njia bora za kuboresha Bajeti ziwe na mtazamo wa kijinsia na kuboresha huduma za WASH (Maji,Usafi na Afya).

"Katika muktadha wa Tanzania, mchakato wa O&OD (Fursa na Vikwazo) ni sehemu ya msingi katika upangaji wa mipango ya maendeleo ya jamii.Mchakato huu unaongozwa na taratibu rasmi za Serikali za mitaa na hushirikisha jamii katika kila hatua ya kupanga." alisema Ndg.Temba.

Ndg.Temba amesema wananchi wana nafasi katika mzunguko wa Mipango na Bajeti katika mwaka wa fedha kwa mwezi Julai -Oktoba ni wakati muhimu kwa jamii kushiriki kwenye mikutano ya vijiji/mitaa kutoa hoja kuhusu huduma za WASH/Kijinsia kwenye Zahanati, Kilimo, Maji n.k.

Mzunguko wa Mipango na Bajeti katika mwaka wa fedha wa Serikali (Julai hadi Juni)

1.Julai-Septemba ; Tathmini ya mwaka uliopita, Kuanza kwa ukusanyaji wa mahitaji  kutoka ngazi ya jamii kupitia O& OD, Ushiriki wa wananchi kwenye mikutano ya vijiji/mitaa kutambua changamoto na fursa.

2.Oktoba-Disemba ; Kamati za Maendeleo za vijiji/mitaa huandaa mpango wa awali, Mahitaji huchambuliwa na kuandaliwa katika nyaraka rasmi, VEOs/MEOs wanajaza fomu maalum ya O & OD inayotoka Halmashauri kupitia kwa WEO , Fomu hii ikishawasilishwa kata, kikao cha WDC kitaitishwa kwa ajili ya kujadili na kupitisha vipaumbele vya kata.

3.Januari-Februari ; Mpango wa vijiji hupelekwa kwenye halmashauri ya Wilaya kwa ajili ya kuchambuliwa kuunganishwa katika mpango wa maendeleo wa mwaka na kisha Baraza la Madiwani la Bajeti linapitisha makadirio ya Bajeti kwa Halmashauri kwa mwaka husika.

4.Machi-Mei ; Halmashauri huandaa rasimu ya Bajeti na kuwasilisha TAMISEMI.

5.Juni ; Bajeti kuu hupitishwa  na Serikali ya Jamhuri ya Muungano wa Tanzania.

Kwa kuzingatia mzunguko huu Jamii itaweza kupanga kwa pamoja njia bora za kuboresha Bajeti  yenye kuzingatia vipaumbele vyenye mtazamo wa kijinsia na huduma za WASH.