DED MILLAO AWAPONGEZA SHULE YA SEKONDARI YA BUKULU KWA KUONDOA ZERO

Posted on: February 21st, 2025

Mkurugenzi Mtendaji wa Halmashauri ya Wilaya ya Kondoa Ndg.Shaban Millao amewapongeza walimu wa shule ya Sekondari Bukulu iliyopo wilaya ya Kondoa kwa jitihada za kuondoa zero katika matokeo ya kidato cha nne.

Sambamba na pongezi hizo ametoa mbuzi wawili kwa walimu hao huku akiwataka kupambana zaidi na kuhakikisha wanapata matokeo mazuri zaidi kwani uwezo wanao na vitende kazi pia wanavyo.

Akimpongeza Rais wa Jamuhuri ya Muungano wa Tanzania Dkt. Samia Suluhu Hassan kwa kuboresha huduma za elimu katika jamii kwani wanafunzi hawatembei umbali mrefu tena kuifuata huduma ya elimu kwani katika kila Kata huduma ya Elimu ya Sekondari imesogezwa ili kuwarahisishia wanafunzi kusoma bila kikwazo chochote ikiwemo mimba za utotoni.

Aidha Mkurugenzi Millao amewataka walimu kufanya kazi yao ipasavyo kwa kujua kila mwanafunzi anavyoishi nyumbani kwani baadhi yao huenda ndiyo baba, ndio mama warudipo nyumbani na hivyo waangalie namna ya kuwasaidia kwani wanahitaji muda mwingi wa kujisomea.

Kwa upande wao walimu wa shule hiyo wamemuahidi Mkurugenzi kuendelea kupambana na kuhakikisha wanafikia malengo kwani kikwazo cha umbali wa shule tayari kimeshatatuliwa na Serikali inayoongozwa na Amiri Jeshi Mkuu, Mhe.Dk. Rais Samia.

Hayo yamejiri Februari 17, 2025 baada ya Mkurugenzi Millao kufanya ziara katika shule hiyo ili kujionea mambo yanavyokwenda.